Vantage Point

Iftikhar Imam Siddiqui - Editor Shair and Grandson of Seemab Akbarabadi

2012-02-20T11:46:00.001-08:00

Woh na hoga to kya kami hogi,
Bas adhoori si zindagi hogi;
Gham hi chaandi hai gham hi sona hai,
Gham na hoga to kya khushi hogi!

http://www.youtube.com/watch?v=ZaElFgZoc9I&feature=related

RIP - Akhlaq Mohammed Khan "Shahryar" (16 June 1936 – 13 February 2012)

2012-02-15T06:55:00.000-08:00

Gulaab jism ka yunhi nahin khila hoga,

Hawa ne pahle tujhe, phir mujhe, chhua hoga;

Shareer shokh kiran mujhko choom leti hai,

Zaroor is mein ishaara tera chhupa hoga;

Meri pasand pe tujhko bhi rashk aayega,

Ke aaine se, jahan tera saamna hoga;

Ye aur baat ki main khud na paas aa paaya,

Pe mera saaya to har shab tujhe mila hoga;

Yeh sonch sonch ke kat'ti nahin hai raat meri,

Ke tujhko sote huey chaand dekhta hoga;

Main tere saath rahoongi wafa ki raahon mein;

Ye ahad hai, na mere dil se tu juda hoga!!!

Insha Allah Khan "Insha"

2012-02-15T05:30:00.000-08:00

Kamar bandhey huey chalney ko yaan sab yaar baithey hain,
Bahot aagey gaye baaqi jo hain taiyyar baithey hain;

Na chhed aye nak'hat-e-baad-e-bahaari raah lag apni,

Tujhe athkheliyaan soojhi hain hum bezaar baithey hain;

Tasavvur arsh par hai aur sar hai paa-e-saaqi par,

Gharaz kuch aur dhun mein is ghadi maikhwaar baithe hain;

Basane naqsh-e-pa-e-rah-rawan ku-e-tamanna mein,

Nahi uthney ki taaqat kya karein lachaar baithe hain;

Ye apni chaal hai uftaadgi se ab ke pahron tak,

Nazar aaya jahan par saaya-e-deewar baithey hain;

Kahan sabr-o-tahammul, aah! nang-o-naam kya shai hai,

Yahan ro peet ke in sab ko hum yakbaar baithe hain;

Nai yeh waz'a sharmane ki seekhi aaj hai tumne,

Hamare paas sahab warna yun sau baar baithe hain;

Najeebon ka ajab kuch haal hai is daur mein yaaron!,

Jisey poochho yehi kahta hai hum bekaar baithe hain;

Bhala gardish falak ki chain deti hai kisey Insha,

Ghaneemat hai ke hum-soorat yahan do chaar baithey hain...

Woh Hamsafar Tha - Naseer Turaabi

2012-02-07T06:32:00.000-08:00

Woh humsafar tha magar us say hum-nawaayi na thi,

Ke dhoop chhaon ka alam raha, judaai na thi;

Na apna ranj na auron ka dukh, na tera malal,

Shab-e-firaaq kabhi hum ne yun ganwaayi na thi;

Mohabbaton ka safar is tarha bhi guzra tha,

Shikasta dil the musaafir shikast paayi na thi;

Adawatein thin,taghaful tha,ranjishein thin magar,

Bichharhne walay mein sab kuch tha,bewafaayi na thi;

Bichharte waqt un aankhon mein thi humari ghazal,

Ghazal bhi woh jo kisi ko abhi sunayi na thi;

Kabhi yeh haal keh donon mein yakdili thi bohat,

Kabhi yeh marhala jaise ke aashnai na thi;

Ajeeb hoti hay rah-e-sukhan bhi dekh Naseer,

Wahan bhi aa gaye aakhir jahan rasayi na thi...

http://www.mastfm103.com/tracks/?10703

Self Composition after a long time - Such a relief!!!

2012-01-18T11:15:00.001-08:00

Aaj tanha hun to tanhaai se ghabrata hun,

Kal tere sath tha aur shahr se nafrat thi mujhe;

Tujh ko paya bhi nahi aur tera ho kar bhi jiya,

Be-ta'alluq si ba-har-haal mohabbat thi mujhe;

Ab to takleef ka ehsaas bhi kam hota hai,

Yun ke har-chand naye zakhm ki aadat thi mujhe;

Ek yehi khalwat-e-jaan shaam-o-sahar taari hai,

Jiski aahat se takhayyul mein bhi wahshat thi mujhe;

Wohi duniya jo badalne ke liye hijrat ki,

Wohi duniya mujhe ma'aloom hai jannat thi mujhe;

Bhar chuke zakhm karam karte hai betaab Figaar,

Phir usi nashtar-e-mish'ghan ki jaraahat thi mujhe!

Ramz...Jaun Elia

2012-01-10T09:05:00.000-08:00

Tum jab aaogi to khoya hua paogi mujhe,
Meri tanhaai mein khwabon ke siwa kuch bhi nahi;
Mere kamre ko sajane ki tamanna hai tumhein,
Mere kamre mein kitaabon ke siwa kuch bhi nahi;

In kitaabon ne bada zulm kiya hai mujh par,
In mein ek ramz hai jis ramz ka mara hua zehan;
Mushday-e-ishrat-e-anjaam nahi pa sakta,
Zindagi mein kabhi araam pa nahi sakta...

Nazm Muhabbat by Amjad Islam Amjad

2011-09-05T09:42:00.000-07:00

Agar kabhi meri yaad aaye,
To chand raaton ki narm, dilgeer raushni mein,
Kisi sitarey ko dekh lena–
Agar who nakhl-e-falak se ud kar tumhare qadmon mein aa gire to,
Yeh jaan lena, woh iste'aara tha mere dil ka,
Agar na aaey...
Magar yeh mumkin hi kis tarha hai, keh tum kisi per nigaah dalo,
To us ki deewar-e-jaa’n na toote,
Woh apni hasti na bhool jaye!!!

Agar kabhi meri yaad aaye,
Gurez karti hawa ki lahro’n pe hath rakhna,
Main khushbuo’n mein tumhey miloo’nga–
Mujhey gulabon ki pattio’n mein talash karna,
Main os qatro’n kay aaino’n mein tumhe miloo’nga–

Agar sitaro’n mein, os qatro’n mein, khushbuo’n mein na pao mujhko,
To apne qadmo’n mein dekh lena,
Main gard hoti musafato’n mein tumhein miloo’nga–
Kahee’n yeh raushan charagh dekho to jaan lena,
Ke har patingey ke sath main bhi bikhar chuka hoo’n,
Tum apne haatho’n se un patingo’n ki khaak darya mein daal dena,
Main khaak ban kar samandaro’n mein safar karoo’ngaa–

Kisi na dekhe huey jazeerey pe ruk ke tum ko sadaayein dunga,
Samandaro’n ke safar pe niklo to us jazeerey pe bhi utarna...

YEH JO HALKA HALKA SUROOR HAI....Ustad NFAK

2011-07-05T13:28:00.001-07:00

Saqi Ki Har Nigah Pay Bal Kha K P Gaya
Lehroon Say Khailta Hoa Lehra K P Gaya
Ey Rehmat-E-Tamaam Meri Har Khata Muaf
Mein Intiha-E-Shouq (Mein) Say Ghabra K P Gaya

Peta Baghair Izm Yeah Kab Thi Meri Majaal
Dar Pardah Chashm-E-Yaar Ki Shay Pa K P Gaya

Paas Rehta Hai Duur Rehta Hai
Koi Dil Mein Zaroor Rehta Hai
Jab Say Dekha Hai Un Ki Aankhon Ko
Halka Halka Suroor Rehta Hai

Aisay Rehtay Hein Koi Mere Dil Mein
Jaisay Zulmat Mein Noor Rehta Hai
Ub Adam Ka Yeah Haal Hai Har Waqt
Mast Rehta Hai Chuur Rehta Hai

Yeah Joh Halka Halka Saroor Hai
Yeah Teri Nazar Ka Qasoor Hai
K Sharab Peena Sikha Diya
Tairay Pyar Nai, Teri Chaah Nai
Teri Behki Behki Nigaah Nai
Mujhay Ik Sharabi Bana Diya…

Sharab Kaisi (What Drink), Khumaar Kaisa (What Elevation)
Yeah Sub Tumhari Nawazishein Hein (It Is All Your Gift)
Pilai Hai Kiss Nazar Say Tu Nai (How I Have Been Made Into An Addict)
K Mujhko Apni Khabar Nahi Hai (I Have No Awareness Of Myself)
Teri Behki Behki Nigah Nai (Your Lost Looks)
Mujhe Ik Sharabi Bana Dia....

Sara Jahan Must, Jahan Ka Nizam (System) Must
Din Must, Raat Must, Saher (Morning) Must, Shaam Must
Dil Must, Sheesha Must, Sabu (Cup Of Wine) Must, Jaam Must
Hai Teri Chashm-E-Must Say Her Khaas-O-Aam (Everyone) Must

Yoon To Saqi Her Tarah Ki Tere MaiKhane Mein Hai
Woh Bhi Thori Si Jo In Aankhon K Paimane Mein Hai
Sub Samajhta Hoon Teri Ishwa-Kari (Cleverness) Ay Saqi
Kaam Karti Hai Nazar Naam Hai Paimane Ka.. Bus!
Teri Behki Behki Nigah Nai
Mujhe Ik Sharabi Bana Diya...

Tera Pyar Hai Meri Zindagi (My Life Is Your Love)
Tera Pyar Hai Meri Bandagi (I Am Enclosed In Your Love)
Tera Pyar Hai Bas Meri Zindagi, Tera Pyar Hai Bas Meri Zindagi
Na Namaz Aati Hai Mujhko, Na Wazoo Aata Hai
Sajda Kar Leta Hoon, Jab Saamnay Tu Aata Hai
Bus Meri Zindagi Tera Pyar Hai....

Mai Azal Say Banda-E-Ishq Hoon, Mujhe Zohd-O-Kufr Ka Gham Nahin (Deep Down I Am A Lover. I Am Not Sad For Hereafter-Hell)
Mere Sir Ko Dar Tera Mil Gaya, Mujhe Ab Talash-E-Haram Nahi
Meri Bandagi Hai Wo Bandagi, Jo Muqeed-E-Dair-O-Haram (Bounded To Any Sacrad Place) Nahi
Mera Ik Nazar Tumhein Dekhna, Ba Khuda Namaz Se Kam Nahi (For Me To Look At You Is No Less Than Namaz)
Bus Meri Zindagi Tera Pyar Hai...
Bus Meri Zindagi Tera Pyar Hai...

Tera Naam Loon Zubaan Say, Tere Aagay Sir Jhuka Doon
Mera Ishq Keh Raha Hai, Mein Tujhe Khuda Bana Doon
Tera Naam Mere Lub Per, Mera Tazkara Hai Dar Dar
Mujhay Bhool Ja'ay Dunya, Mein Agar Tujhe Bhula Doon
Mere Dil Mein Bus Rahe Hein, Tere Bepanah Jalwe
Na Ho Jiss Mein Noor Tera, Woh Charagh Hi Bujha Doon

Jo Pucha K Kis Tarah Hoti Hai Baarish, Jabeen (Forehead) Se Paseene Ki Boondein Gira Di
Jo Pucha K Kis Tarah Girti Hai Bijli, Nigahein Milaein Mila Kar Jhuka Dein
Jo Pucha Shab-O-Roz Milte Hain Kaise, To Chehre Pe Apne Wo Zulfein Hata Deein
Jo Pucha K Naghmon Mein Jaadu Hai Kaisa, To Meethe Takallum Mein Baatein Suna Deein
Jo Apni Tamanaon Ka Haal Poocha , To Jalti Howi Chand Shamein Bhujha Deein
Main Kehta Reh Gaya Khata-E-Mohabbat Ki Achi Saza Di

Mere Dil Ki Dunya Bana Kar Mita Di, Acha!
Mere Baad Kisko Satao Gay,
Mujhe Kis Tarah Se Mitao Gay
Kahan Ja Ke Teer Chalao Gay

Meri Dosti Ki Balaein Lo
Mujhe Haath Utha Kar Duaein Do, Tumhein Ek Qatil Bana Diya
Mujhe Daikho Khuwahish-E-Jan-E-Jaan
Main Wohi Hoon Anwar-E-Nim Jaan

Tumhain Itna Hosh Tha Jub Kahan
Na Chalao Is Tarah Tum Zaban
Karo Mera Shukriya Meherban
Tumhein Baat Karna Sikha Diya...

Yeh Jo Halka Halka Saroor Hai, Yeh Teri Nazar Ka Kasoor Hai
Kay Sharab Peena Sikha Diya...

Mohammad Rafi Sauda

2011-03-05T17:29:00.000-08:00

Ve sooratein ilaahi kis des bastiyan hain,
ve jinke dekhne ko aankhen tarastiyan hain;

Barsaat ka to mausam kabka guzar gaya hai,
Mishghan ki yeh ghatayein ab tak barastiyan hain;

Kyun kar na hoye zakhmi sheesha sa dil hamara,
Us shokh ki nigaahein patthar mein dhastiyan hain;

Qeemat mein inki go ham do jug to de chuke hain,
Us shokh ki nigaahein is par bhi sastiyan hain;

Jab main kaha yeh us se Sauda se apne mil ke,
Is baar tu hai saaqi aur mai-parastiyan hain!

IBN-E-INSHA

2010-12-19T06:34:00.000-08:00

Naaz tha khud par magar aisa na tha,

Aaine mein jab talak dekha na tha;

Shahr ki mahroomiyaa'n mat poochhiye,

Bheed thi par koi bhi apna na tha;

Manzilein aawaaz deti reh gaee'n,

Hum pahonch jaate magar rasta na tha;

Itni dilkash thi kahaan ye zindagi,

Hamne jab tak aapko chaaha na tha....

Basheer Badr

2010-12-19T06:29:00.000-08:00

Agar yaqeen nahi aata to aazmaaye mujhe,
Wo aaeena hai to phir aaeena dikhaaye mujhe;

Ajab charaagh hun din-raat jalta rahta hun,

Main thak gaya hun hawa se kaho bujhaaye mujhe;

Main jiski aankh ka aansu tha usne qadr na ki,

Bikhar gaya hun to ab ret se uthaaye mujhe;

Bahot dino se main in pattharo'n mein patthar hun,

Koi to aaye zara der ko rulaaye mujhe;

Main chaahta hun ke tum hi mujhe ijaazat do,

Tumhari tarha se koi gale lagaaye mujhe...

Ashar Iqbal

2010-11-13T14:18:00.000-08:00

Mere jazbaaton mein phir se woh rawaani aai,
Aaj phir yaad muhabbat ki kahaani aai;

Aaj phir neend ko aankhon se bichhadte dekha,
Aaj phir yaad koi chot purani aai;

Muddaton baad mayassar hua maa ka aanchal,
Muddaton baad hamein neend suhaani aai;

Muddaton baad chala un pe hamara jaadu,
Muddaton baad hamein baat banani aai;

Muddaton baad qareeb aaya hai darya mere,
Muddaton baad hamein pyaas bujhani aai;

Muddaton baad khuli vus'at-e-sahra hum par,
Muddaton baad hamein khaak udaani aai;

Itni aasaani se milti nahi fan ki daulat,
Dhal gai umr to ghazlon pe jawaani aai!!!

Ghazal

2010-10-29T13:35:00.000-07:00

Kisi Din...

2010-10-18T11:59:00.000-07:00

Wish- Ek Khwahish

2010-10-13T16:05:00.001-07:00

Ek Ghazal

2010-10-13T16:01:00.001-07:00

Amjad Saahab

2010-10-13T11:13:00.000-07:00

Zafar Gorakhpuri

2010-10-08T13:13:00.001-07:00

Hamari zindagi bewa dulhan bheegi hui ladki,
Jaleinge chupke chupke sab dhuan koi na dekhega!

Ek Nazm

2010-09-23T13:25:00.000-07:00

Baarishon ke mausam mein,
Unko yaad karne ki,
Aadatein puraani hain,
Ab ke baar soncha tha,
Aadatein badal deinge,
Phir khayaal aaya ke,
Aadatein badalne se,
Baarishein nahin ruktin...

Aansuon ka rishta hai,
Ankh se yunhi jaise,
Dariya ka samandar se,
Thokaron ka patthar se,
Motiyon ka gauhar se,
Zindagi ka gham se hai,
Zabt ka sitam se hai,
Jo tumhara ham se hai...
Dard ke ghane baadal,
Jis ghadi umadte hain,
Baarishein to honi hain,
Baarishein to hoti hain,
Baarishon ko hone se,
Kaun rok sakta hai...

Chris Daughtry- I'm going home...

2010-09-20T14:18:00.001-07:00

I'm staring out into the night

And trying to hide the pain

I'm going to the place where love

and feeling good don't ever cost a thing,

And the pain you feel's a different kind of pain

I'm going home to the place where I belong

where your love has always been enough for me

I'm running from you know I think you got me all wrong

I don't regret this life I chose for me

But these places and these faces are getting old

So I'm going home

The miles are getting longer it seems

The closer I get to you.... babe

I've not always been the best man and friend for you

But your love remains true and I don't know why

You always seem to give me another try

I'm going home

To the place where I belong

Where your love has always been good enough for me

I'm running from you know I think you got me all wrong

I don't regret this life I chose for me

But these places and these faces are getting old

Be careful what you wish for

cause you just might get it all

you just might get it all and then some you dont want

be careful what you wish for cause you just might get it all

You just might get it all

I'm going home to the place where I belong

Where your love has always been enough for me

And I'm running from.. you know I think you got me all wrong

I don't regret this life I chose for me'

But these places and these faces are getting old

I'm going home

I'm going home...

Ek Sher

2010-09-09T15:12:00.000-07:00

Suljha hua sa fard samajhte hain mujhko log,
Uljha hua sa mujh mein koi doosra bhi hai!

Figaar

2010-09-09T14:55:00.001-07:00

Aksar shab-e-firaaq se wahshat hui mujhe,

Tab ja ke tere hijr ki aadat hui mujhe;

Khamosh ho gaya hai jo shor-e-nawa-e-dil,

Charagaran-e-shahr se fursat hui mujhe;

Mahsoos kar raha hun abhi bhi main tera karb,

Aisa nahin ke dard se raahat hui mujhe;

Ab woh tadap woh tees woh gham mein khalish kahan,

Zakhmon se dheere dheere faraghat hui mujhe;

Dil jal gaya to saath hi armaan jal gaye,

Mehr-o-wafa ke naam se nafrat hui mujhe;

Ab kaun yaad aaye kise yaad kijiye,

Ek umr ho gai ke muhabbat hui mujhe;

Shaam-o-sahar hain sarf ba'ma'amool is tarah,

Goya meri hayaat amanat hui mujhe;

Muddat mein phir Figaar kisi bewafa ka naam,

Aaya meri ghazal mein to hairat hui mujhe!!!

Amjad Islam Amjad

2010-09-07T14:26:00.001-07:00

Daam-e-khushbu mein giraftaar saba hai kab se,

Lafz izhaar ki uljhan mein pada hai kab se;

Ai kadi chup ke dar-o-baam sajane wale,

Muntazir koi sar-e-koh-e-nida hai kab se;

Chaand bhi meri tarah husn shanasa nikla,

Uski deewaar pe hairaan khada hai kab se;

Baat karta hun to lafzon se mahak aati hai,

Koi anfaas ke parde mein chhupa hai kab se;

Shaibdahbaazi-e-aaina-e-ehsaas na pooch,

Hairat-e-chashm wohi shokh qaba hai kab se;

Dekhiye khoon ki barsaat kahan hoti hai,

Shahr par chhi hui surkh ghata hai kab se;

Koor chashmon ke liye aaina khaana maloom,

Warna har zarra tera aksnuma hai kab se;

Khoj mein kis ki bhara shahr laga hai Amjad,

Dhoondhti kisko sar-e-dasht hawa hai kab se!

Click at the left of the post to view in urdu script.

Jaun Eliya

2010-09-02T08:54:00.001-07:00

Zindaaniyaan-e-shaam-o-sahar khairiat se hain,

Har lamha jee rahey hain magar khairiat se hain;

Shahr-e-yaqeen mein ab koi dam kham nahi raha,

Dasht-e-gumaan ke khaak basar khairiat se hain;

Aakhir hai kaun jo kisi pal kah sak yeh baat,

Allah aur tamaam bashar khairiat se hain;

Hai apne apne taur pa har cheez is ghadi,

Mizsghaan-e-khushk-o-daaman-e-tar khairiat se hain;

Ab faislon ka kam nazaron par madaar hai,

Yani tamaam ahl-e-nazar khairiat se hain;

Pairon se aablon ka wohi hai muaamla,

Saudaaiyaan-e-haal ke sar khairiat se hain;

Hum jin gharon ko chhod ke aaye the naagahaan,

Shikwe ki baat hai,wo agar khairiat se hain;

Loo chal rahi hai, mehv hai apne mein dopahar,

Khaak udd rahi hai aur khandhar khairiat se hain;

Hum ahl-e-shahr apne jawaanon ke darmyaan

Jaun ! ek moajiza hai agar khairiat se hain;

Barbaad ho chuka hai hunar ik hunar ke saath,

Aur apne saahibaan-e-hunar khairiat se hain;

Shukr-e-Khuda shaheed huey ahl-e-haq tamaam,

Bargushtawaan-e-tegh-o-tabar khairiat se hain;

Ab us ka qasr-e-naaz kahaan aur wo kahaan,

Bas dar hai aur banda-e-dar khairiat se hain;

Hum hain ke shaayari hai hamare liye azaab,

Warna tamaam Josh-o-Jigar khairiat se hain;

Shayer to do hain MEER TAQI aur MEER JAUN;

Baaqi jo hain wo shaam-o-sahar khairiat se hain!!!

-Jaun Elia Az Yaani

Chand Ash'aar

2010-08-28T17:53:00.000-07:00

Daastaan yaad koi aaj puraani aai,
Jaise thahre huey pani mein rawaani aai!

Main to ghazal suna ke akela khada raha,
Sab apone apne chaahne walon mein kho gaye!

Wo maza diya tadap ne ke yeh aarzu ahi ya rab,
Mere dono pahluon mein dil-e-beqaraar hota!

Kal dopahar ajeeb si ek bedili rahi,
Bas teeliyan jala ke bujhata raha hun main!

Yehi bahot hai ke mujh par teri tavajjo hai,
Teri nigaah ka andaaz dusra hi sahi...

...I like...

2010-08-21T17:00:00.001-07:00

Darmaan-e-gham-e-hijr agar ho ke mujhe kya,

Ab ja ke tumhein meri khabar ho to mujhe kya;

Jab ho gai gham se meri duniya tah-o-baala,

Ab ek jahan zer-o-zabar ho to mujhe kya;

Jab khaak bhi baaqi na rahi qalb-o-jigar ki,

Tum mere liye khaak basar ho to mujhe kya;

Mere dil-e-veeran mein ujaala nahin hota,

Tum ghairat-e-khursheed-o-qamar ho to mujhe kya;

Hai ab meri duniya mein sarasar shab-e-furqat,

Ab is shab-e-furqat ki sahar ho to mujhe kya;

Achha hai ke bin mere guzar jaaye kisi ki,

Aur yun bhi kisi kin a guzar ho to mujhe kya...

Saahir- Madaam!!!

2010-08-18T08:29:00.000-07:00

Aap bevajaha pareshaan si kyon hain maadaam,

Log kahte hain to phir theek hi kahte honge,

Mere ehbaab ne tahazeeb na seekhee hogi,

Mere maahaul mein insaan na rahte honge;

[maadaam=Urdu equivalent of Madam] [ehbaab=friends; maahaul=environment/surrounding]

Noor-e-sarmaayaa se hai roo-e-tamaddun kii jila,

Ham jahaan hain vahaan tahzeeb nahn pal sakati,

Muflisi hiss-e-lataafat ko mita deti hai,

Bhookh aadaab ke saanche mein nahin dhal sakti;

[noor-e-sarmaayaa=light of wealth; roo-e-tamaddun=face of civilization] [jilaa=shine/brightness; hiss-e-lataafat=finer feelings] [aadaab=genteel/civilized/politeness]

Log kahte hain to logon pe ta’ajjub kaisa,

Sach to kahte hain ke naadaaron ki izzat kaisi,

Log kahte hain – magar aap abhi tak chup hain,

Aap bhi kahiye ghareeibon mein sharaafat kaisi;

[naadaaron=poor]

Nek maadaam! Bahot jald vo daur aayegaa,

Jab hamein zeest ke advaar parakhane honge,

Apni zillat ki qasam, aap ki azmat ki qasam,

Hamko taa’zeem ke maiyaar parakhne honge;

[zeest=life; advaar=values; zillat=humiliation] [azmat=greatness; taa’zeem=respect; maiyaar=level]

Hamne har daur mein tazleel sahi hai lekin,

Hamne har daur ke chehre ko ziyaa bakhshi hai,

Hamne har daur mein mehnat ke sitam jhele hain,

Hamne har daur ke haathon ko hina bakhshi hai;

[tazleel=insult; ziyaa=brightness/brilliance]

Lekin in talkh mubaahis se bhala kya haasil,

Log kahte hain to phir theek hi kahte honge,

Mere ehbaab ne tahzeeb na seekhi hogi,

Mere maahaul mein insaan na rahte honge!!!

[talkh=bitter; mubaahis=arguments]

Sauda

2010-08-07T14:14:00.000-07:00

Hosh Tirmizi

2010-07-17T03:38:00.000-07:00

Yaadein chalin khayaal chala ashk-e-tar chale,
Lekar payaam-e-shauq kai namabar chale;

Dil ko sambhalte rahe har haadse pe ham,
Ab kya karein ke khud tere gesu bikhar chale;

Har gaam pe shikast ne yun hausla diya,
Jis tarha saath saath koi hamsafar chale;

Shauq-e-talab na ho koi baang-e-jaras to ho,
Aakhir koi chale to kis ummeed par chale;

Ab kya karoge sair-e-chamanzaar-e-aarzu,
Rut ja chuki chadhe huey darya utar chale;

Raahon mein "Hosh" sang baraste hain har tarah,
Lekar yeh kaarvaan-e-tamanna kidhar chale!

Ek koshish- Ek sher dekh kar!

2010-07-10T19:48:00.000-07:00

Woh mujhse poochh raha hai batao kaisa hai,
Jo maine tumko diya tha woh ghao kaisa hai;

Abhi bhi tees se raaton ko jagte ho ke nahin,
Kuch apne zakhm ki haalat sunao kaisa hai;

Kaha to tha ke bahut sakht marhale honge,
Yeh meri zaat se tumko lagao kaisa hai;

Shadeed karb mein jeena bhi raas hai tumko,
Tumhare shauq ka yeh chal chalao kaisa hai;

Talash kar hi lo mil jayega koi tumko,
Meri hi simt tumhara jhukao kaisa hai;

Shringaar husn ki fitrat rahi hai sadiyon se,
Tumhare ishq mein aakhir banao kaisa hai;

Woh jis shahar mein basar kar rahe ho umr Figaar,
Muhabbaton ka wahan rakh rakhao kaisa hai!

AMU- Tumhare Naam!

2010-07-10T19:43:00.000-07:00

Muddat se thaki in aankhon ko ab neend kahan aaraam kahan,
Ab khwaab tumhare kyun aayein ab koi sunehri shaam kahan;

Jab ham the tumhare pahlu mein kisko thi khabar kya hona hai,
Ab tum jo hamare paas nahi phir fikr-e-gham-e-ayyaam kahan;

Tumne to bahot aasaani se sab qasmein waade tod diye,
Main dil ko yeh kaise samjhaun ab mujhse bhala kuch kaam kahan,

Mai roz pilaai pahron tak neem aankhon se kuch raat dhale,
Barsaat gai woh baat gai ab koi shakista jaam kahan;

Mauzoo-e-sukhan tum ab bhi ho, Roodaad-e-chaman tum ab bhi ho,
Han sarv-o-saman tum ab bhi ho, Tum par hai koi ilzaam kahan;

Woh ishq pasheman ab bhi hai go husn farozan ab bhi hai,
Main giriya-e-hairaan ab bhi hun han tumko magar ibraam kahan;

Tum door sahi ehsaas to hai kuch tumko wafa ka paas to hai,
Main hosh-o-khirad ka deewana ab zehn mein woh hangaam kahan;

Kahte ho Figaar apna usko phir dost se tumko shikwa kyun,
Uski bhi to majboori samjho tha usko bhala ilhaam kahan!

Firaaq Gorakhpuri

2010-05-23T04:39:00.000-07:00

Kisi ka yun to hua kaun umr bhar phir bhi,
Ye husn-o-ishq to dhokha hai sab magar phir bhi;

Hazaar baar zamaana idhar se guzra hai,
Nayee nayee si hai kuch teri reh-guzar phir bhi;

Khusha Ishara-e-paiham, zah-e-sukoot nazar,
Daraaz hoke fasaana hai mukhtasar phir bhi;

Jhapak rahi hain zaman-o-makan ki bhi aankhen,
Magar hai qaafila amada-e-safar phir bhi;

Palat rahe hain ghareeb-ul-watan palatna tha,
Wo koocha rokash-e-jannat ho, ghar hai ghar phir bhi;

Teri nigaah se bachne mein umr guzri hai,
Utar gaya ragh-e-jaan mein ye neshtar phir bhi...

Yaadein...

2010-05-20T13:42:00.000-07:00

Bahut betaab karti hai sukun hone nahin deti,
Tumhari yaad raaton ko mujhe sone nahi deti;

Khushi bhi is tarah haasil hui hai ek muddat par,
Ke sab kuch mil gaya aur phir bhi gham khone nahi deti;

Woh lamhe yaad kar ke muskura utth'ta hun khilwat mein,
Shab-e-hijran mein bhi woh kaifiyat rone nahin deti!

Rainbow!

2010-05-13T11:25:00.000-07:00

When sunshine mingles with the rain,

It casts a rainbow you adore;

When happiness’ sprinkled o’er the pain,

You feel there’s no feeling sore;

When colors fly into the sky,

The water feels so nice and pure;

When pain subsides though for a while,

It seems you’ve found eternal cure;

Then sunlight grows and rainbow fades,

So you feel that the pleasure’s gone;

You crave for pain when joy abounds,

‘cause that is what you’ve always done;

You know the rain will come again,

And sun will hide behind the cloud;

You know the pain will come again,

And cast on heart a deathly shroud;

Thus you don’t need to feel the joy,

Or sadnee in extreme, my friend;

‘cause king and pawn go back,

Into the same box when the game’ll end;

But that one chance eternal bliss,

Will always soothe your mind for long;

That you’re the one, who saw the rainbow,

Youre the one who wrote the song!

Qaus-e-Kuzah (The Rainbow)

2010-05-12T12:07:00.001-07:00

Rang bharne ka bhi andaaz hua karta hai,
Rang bharne ka saleeqa nahin aata sabko,
Chubhne lagte hain agar zyaada hon tasveer mein rang,
Aur kam hon to khala sa koi rah jaata hai,

Rang qudrat ne bhara kaisa dhanak mein dekho,
Ek se ek mila aur juda hain phir bhi,
Mukhtalif ho ke bhi kis tarha se yakjaai hai,
Kitne rangeen hain bearish se dhule hain phir bhi,

Maine ek baar bade shauq se bas ek hi baar,
Ek tasveer mein rang bharne ki koshish ki thi,
Is tarah dho diya barish ne dukhon ki usko,
Ab mujhe yaad nahi kaun sa rang kiska tha,

Uske chehre ka tha jo rang woh ab pheeka hai,
Meri tanhaai ka ab rang bahut gahra hai,
Zehn mein jalte hain yaadon ke kai rang ke charagh,
Kitni rangeen hai duniya pe Colourblind hun main!

Hmmmm

2010-05-09T01:27:00.000-07:00

Pahle rashk-e-jinan ki baat karo,
Phir mere imtehan ki baat karo;

Tumse kisne kaha ke tum mujhse,
Fikr-e-sood-o-ziyan ki baat karo;

Maut barhaq hai uski mahfil mein,
Hasti-e-jaawidan ki baat karo;

Kat rahi hai kisi tarah shab-e-gham,
Bas usi jaan-e-jan ki baat karo;

Phool jhadte hain jumbish-e-lab se,
Mujhse saare jahan ki baat karo;

Hum jahan hain wahan hai tanhai,
Tum jahan ho wahan ki baat karo;

Kya guzarti hai tum pe furqat mein,
Tum bhi zakhm-e-nihan ki baat karo;

Saari baatein fizool hain shayad,
Unko fursat kahan ke baat karo;

Mahv hain sab talash-o-kaavish mein,
Koi umr-e-rawan ki baat karo;

Lutf kya hai khushi ke lamhon mein,
Gham ke koh-e-giran ki baat karo;

Is zamin se ulajh ke dekh liya,
Ab Figaar aasmaan ki baat karo!

9th May

2010-05-08T10:51:00.000-07:00

Zeest par meri jo mushkil hai usey hal kar de,
Main usey bhoolun to ya rab mujhey pagal kar de;

Uski zulfein hain ghani aur meri aankhon mein nami,
Mujhko barsaat bana de usey badal kar de;

Shergoi ka shaghal hota hai maiyaar ke saath,
Ya mere zehn ko vus’at de ya lab shal kar de;

Wo tabassum ke jise dekh ke sharmaati hai barq,
Wo mere yaar ke chehre pe musalsal kar de,

Ab to gulshan ki tamanna hai na phoolon se lagao,
Ab dua hai yahi maula mujhe jungal kar de;

Ye tasavvur to meri jaan hi lega ek roz,
Jo nigaahon se hai khwaabon se bhi ojhal kar de;

Lams ki aanch mein jalna meri qismat hai to phir,
Do ghadi to mere ehsaas ko sandal kar de;

Wo meri sonch ki had se nahi nikla ab tak,
Kaisa qaidi hai jo sayyaad ko bojhal kar de;

Ek muddat se tamasha nahi dekha usne,
Jan-nisaari ki rawish phir sar-e-maqtal kar de;

Uski tafseel Figaar itni bhi aasaan nahin,
Tu ghazal apni baharhaal mukammal kar de!

Abstract

2010-05-08T10:48:00.001-07:00

Shauq-e-aashuftasari apni jagah,
Charkh ki kareegari apni jagah;

Zabt ka bhi apna ek maiyaar hai,
Dard-e-dil ki bartari apni jagah;

Mausiqui gar sunte hain aaraam bakhsh,
Kaif-e-zauq-e-shayari apni jagah;

Lutf kya gar aaina toote nahin,
Han magar sheeshagari apni jagah;

Manzil-e-maqsood kya kisko khabar,
Han fareb-e-zaahiri apni jagah;

Zaast ke ma’ani to koi ho Figaar,
Awwalin-o-aakhiri apni jagah!

...03/05/2010...

2010-05-03T08:15:00.000-07:00

Kya tha tum mein jo ab nahin milta,
Bebasi ka sabab nahin milta;

Dilkashi husn ki wohi hai magar,
Tujhsa dildaar ab nahin milta;

Rab ne sab kuch diya hai jab mujhko,
Tera rukhsaar-o-lab nahi milta;

Mil hi jaate hain chaahne waale,
Han koi be-talab nahin milta;

Mahfilon mein yeh shor kaisa hai,
Koi zauq-e-adab nahi milta;

Woh ho dair-o-haram ke dar tera,
Bandgi mein woh dhab nahin milta;

Pahle Moosa sa shauq paida kar,
Kaun kahta hai rab nahin milta;

Khud pe rakh aitmaad us pe yaqin,
Dahr mein dard kab nahin milta;

Sher kahna bhi koi khel nahin,
Dhoondh ek lafz jab nahin milta;

Woh nahin hai to sab mila hai Figaar,
Sach zamane mein sab nahin milta!

Qitaa'

2010-04-30T13:27:00.000-07:00

Ab to apni ye tabeeyat bhi juda lagti hai,
Saans leta hun to zakhmon ko hawa lagti hai;
Kabhi raazi to kabhi mujhse khafa lagti hai,
Ai meri zeest bata tu meri kya lagti hai!

Sher kahna bhi ek fan hai Figaar,
Lafz khairaat se nahi milte;
Dard-e-dil sarf karna padta hai,
Zakhm auqaat se nahi milte!

Sharah-e-gham ka bhi ek saleeqa hai,
Harf bas aas mein nahi milte,
Hum ghazal kahte hain so jaante hain,
Sher meeraas mein nahi milte!

...

2010-04-30T13:24:00.001-07:00

Kuch bhi to nahi hai jo mere paas nahi hai,
Yeh baat alag hai mujhe ehsaas nahi hai;

Dil kahta hai ek roz woh lautega yaqeenan,
Us din ki magar mujhko koi aas nahi hai;

Ab wasl ki hai yaad na kuch hijr ka gham hai,
Ek umr se yeh dil mera hassas nahi hai;

Mujhko bhi wafaon pe nadaamat nahi apni,
Tujhko bhi mere shauq ka kuch paas nahi hai;

Ek umr meri sarf-e-junun guzri hai lekin,
Ab dard meri zeest ki meeraas nahi hai;

Han wasl ka kuch shauq bhi baaqi nahi ai dost,
Go hijr ka aalam bhi mujhe raas nahi hai;

Main aam sa shaayar hun Figaar aur likhun kya,
Ab arz-e-tamanna ka junun khaas nahi hai!

Mutafarriq Ash'aar... (Couplets)

2010-04-30T13:22:00.000-07:00

Woh ek khat jo tujhe aaj tak likha bhi nahi,
Woh ek khat mere khwaabon mein raqs karta hai!

Tumhi ne chhod diya mujhko raaste mein Figaar,
Main intezaar na karta to aur kya karta!

Muhabbat dard ke hungaam ko kahte hain Figaar,
Maine jis shai se wafa ki wohi Kaafir nikla!

Tune dekhi nahin us shokh ki aankhein warna,
Tujhko ehsaas to hota ke sharaarat kya hai!

25th April...5:30 am

2010-04-25T02:49:00.000-07:00

Zindagi kitni mukhtasar hoti,
Tere humraah gar basar hoti;

Ashk aankhon mein phir nahi aate,
Tere khwaabon ki gar sahar hoti;

Tum na hote to kya nahi hota,
Kash yunhi guzar basar hoti;

Dard hai ba'is-e-gham-e-hasti,
Ek khushi kaash mo'atbar hoti;

Lutf tha jab ke wasl ki hasrat,
Jo idhar hai wohi udhar hoti;

Ishq kaamil nahi abhi warna,
Aah kyun Aah! be-asar hoti;

Khauf-e-tareeki-eshab-e-hijran,
Zindagi kash dopahar hoti;

Hum pe guzri hai jo muhabbat mein,
Kaifiyat gar woh aap par hoti;

Ab guzarni muhaal hai Maula,
Shukr mushkil jo mujhse sar hoti;

Aafat-e-jaan hai sozish-e-jaanan,
Ai Figaar ab to darguzar hoti!

Pang of Nostalgia

2010-04-13T13:06:00.000-07:00

When wandering down the winding road,
Of memory lane my past abode,
I come to stop where it starts,
The place where I lost my treacherous heart,
The light is on inside your house,
A glimpse of you enough to rouse,
The feelings dormant deep stood,
I feel again as lost in woods,
I wonder how come you command,
My heart albeit so far I stand,
The magic simply does the trick,
I try to find a hole in brick,
Just one more glimpse and I’ll be fine,
Wish you too harbour thoughts like mine,
O love! Why did you break me down?
Was she the only one in town?
Why didn’t you fetch me someone else?
Who might have come with ringing bells,
With me who might have felt secured,
For whom I might have all endured,
This agony hurts my feelings pure,
I wish someday I find some cure!

Ek Khwaab...

2010-04-13T13:01:00.001-07:00

Ab sar-e-raahguzar kya karte,
Shauq bismil tha Safar kya karte;
Yun to ek umr musaafat mein kati,
Sham ko laut ke ghar kya karte;
Zeest se koi shikaayat to nahin,
Tujhse thi mujhko magar kya karte;
Tum manate jo mujhe kya hota,
Hum khafa hote agar kya karte;
Ishq mahroom-e-tamanna hi raha raha,
Husn se rooh ko tar kya karte;
Jab ke woh gosh-e-muhabbat ki nahin,
Apni ghazlon ka hunar kya karte;
Apne dil par hi nahi tha qabu,
Mushkilein zeest ki sar kya karte;
Ab kise apni tabaahi ka gila,
Ab bhala khauf-o-khatar kya karte;
Ab junoon hai na tavaqqo hai Figaar,
Muzmahil naale asar kya karte!

KAIFI AZMI...

2010-04-11T17:02:00.000-07:00

Ab tum aaghosh-e-tasavvur mein bhi aaya na karo,
Mujhse bikhre hue gesu nahi'n dekhe jaate,
Surkh aankho'n ki qasam kaanpti palko'n ki qasam,
Thar-tharaate hue aansu nahi'n dekhe jaate;

Ab tum aaghosh-e-tasavvur mein bhi aaya na karo,
Chhoot jaane do jo daaman-e-wafa chhoot gaya,
Kyun ye laghzeeda kheraami ye pashemaa'n nazari,
Tumne toda to nahi'n rishta-e-dil toot gaya;

Ab tum aaghosh-e-tasavvur mein bhi aaya na karo,
Meri aaho.n se ye rukhsaar na kumhla jaayein,
Dhoondhti hogi tumhein ras mein nahaai huee raat,
Jaao kaliyaa'n na kahee'n sej ki murjha jaayein;

Ab tum aaghosh-e-tasavvur mein bhi aaya na karo,
Main is ujde huey pahlu mein bitha loon na kahee'n,
Lab-e-sheeree'n ka namak aariz-e-namkee'n ki mithaas,
Apne tarse huey hontho'n mein chura loon na kahee'n...

Mutafarriq Ash'aar... (Couplets)

2010-04-10T19:37:00.000-07:00

Main usko bhoolna chahun to bhool sakta hun,
Magar main yaad karun kya usa bhulane ke baad!

Khwaab taseer baneinge to qayaamat hogi,
Kuch to rahne do ke Allah ko main yaad karun!

Kuch faasla bhi chahiye ulfat ke darmayaan,
Jab qurbatein badheingi to dil toot jayeinge!

Aaya hun anjuman mein faqat is liye Figaar,
Dekhun woh kis tarah hain mukhatib raqeeb se!

Aksar tere khayaal se ghafil raha hun main,
Aksar tumhari yaad ne phir gham badha diya!

Tere baghair bhi jeena bahut muhaal nahin,
Yeh aur baat ke mujhse jiya nahi jaata!

Bahut azeez tha woh shakhs han magar yaaron,
Bichhad gaya to mujhe bhoolna pada aakhir!

Apne kuch khwaab hi lauta do munasib ho agar,
Ek muddat se mujhe neend nahin aati hai!

Mutafarriq Ash'aar... (Couplets)

2010-04-09T15:46:00.000-07:00

Uski aankhon mein koi shahr bhi basta hoga,
Jab se bichhde hain hamein sirf dikhe veeraane...

Toot kar bikharne mein ek ajab maza hai ji,
Aapne muhabbat ki aap jaante hoge... ;-)

Usi ki yaad se hoti hai ek khalish dil mein,
Woh jiski yaad se dil ko sukoon milta hai!

Ek hi raat ka mujhko raha afsos ke wo,
Jo tere hijr mein guzri woh kahan guzri hai!

Zeest karne ke saleeqe mein zaroori fan hai,
Apne ansu jo tumhein aap bhi peena aaye!

Tum agar laut ke aa jao to ab bhi janaan,
Is dahakte huey sahra mein bahaar aa jaye...

Yaas Yagana Changezi

2010-04-09T14:58:00.001-07:00

Mujhe dil ki khata par 'Yaas' sharmana nahin aata,
Paraaya jurm apne naam likhwanaa nahin aata;

Bura ho paa-e-sarkash ka ki thak janaa nahin aata,
Kabhi gumraah ho kar raah par aana nahin aata;

Mujhe ae naakhuda aakhir kisi ko munh dikhaana hai,
Bahaana kar ke tanha paar utar jaana nahin aata;

Museebat ka pahaad aakhir kisi din kat hi jaayega,
Mujhe sar maar kar teshe se mar jaana nahin aata;

Aseeron shauq-e-azaadi mujhe bhi gudgudata hai,
Magar chaadar se baahar paanv phailaana nahin aata;

Dil-e-be-hausla hai ek zara si tees ka mehmaan,
Wo aansu kya piyega jis ko gham khana nahin aata...

Aasaan lafz!

2010-04-09T13:33:00.000-07:00

Ab bhala chhod ke ghar kya karte,
Shaam ke waqt safar kya karte;

Teri masroofiyatein jaante the,
apne aane ki khabar kya karte;

Jab sitare hi nahin mil paye,
Le ke hum shams-o-qamar kya karte;

Woh musafir hi kadi dhoop ka tha,
Saaya phailaye shajar kya karte;

Khaak hi awwal-o-aakhir thi yahan,
Kar ke zarrey ko guhar kya karte;

Raai pahle se bana li tune,
Dil mein ab hum tere ghar kya karte;

Ishq ne saare saleeqe bakhshe,
Husn se kasb-e-hunar kya karte!

Parveen Shakir!

Ek Koshish...

2010-04-08T08:41:00.000-07:00

Har tamanna ko door kar baitha,
Ishq jab nasaboor kar baitha;

Shauq tha rausshni ka yu mujhko,
Apni aankhon ko koor kar baitha;

Tujhse bichhda to teri yaad ke saath,
Main ghazal ka shaour kar baitha;

Ek teri yaad ka nasha jaanan,
Mujhko andar se choor kar baitha;

Tumne kya ki khata muhabbat mein,
Han magar main zaroor kar baitha;

Tum mere ho sake na hoge kabhi,
Dekho main sab ko door kar baitha;

Tujhse dil kya lagaya dekh mujhe,
Dekh main khud ko toor kar baitha;

Itni masroofiyat hai yaar Figaar,
Phir bhi shikwa zaroor kar baitha...

...

2010-04-07T15:47:00.001-07:00

Yaad to ab bhi tujhe hongi woh baatein lekin,
Shelf mein rakkhi hui band kitaabon ki tarah...

Just an effort to recapture the glory days of my writing!

2010-04-06T12:43:00.000-07:00

When pain abandons me, the loneliness is queer,
Though wounds they never heal and yet remain so dear;

When words become so scarce and thought no more steers,
It’s hard to write your past obliterated by tears;

When tears go all dry and feelings appear dumb,
Despite your beating heart you feel so hollow numb;

When memories make collage and rain brings the scent,
The tint betrays the sight and darkness looms bent;

I think and think of you and I think and think of you!

July 2009

2010-04-06T12:41:00.001-07:00

Kahte ho ke mil jayega mujh jaisa sanam aur,
Dhoondhun to lagein mujhko abhi kitne janam aur;

Dil se mere milti nahin tanqeed tumhari,
Go fark bas itna hai ke tum aur ho hum aur;

Hum aaj tumhare hain nay un phero nigaahein,
Pachhtaoge phir karlo abhi zulm-o-sitam aur;

Ashkon se bhadakti hai lahu pee ke badhi hai,
Bhadkaye nay eh aag kahin abr-e-karam aur;

Aawaaz pe us shokh ki sil jaate hain yeh hont,
Mauzu-e-sukhan honge lab-o-gosh baham aur;

Sonchun tere bare mein to tham jaate hain naale,
Har fikr se behtar hai teri yaad ka gham aur;

Jo tere tasavvur mein guzar jaye woh behtar,
Rahta hai wale yun bhi meri aankh ka nam aur;

Hai maut ka khatka bhi to barbaadi ka dar bhi,
Aur us pe teri yaad bhi ab aati hai kam aur;

Pyaale ki kahan qaid jo sahba se ho nisbat,
Saaqi ki nazar mein hai nihan saaghar-e-Jam aur;

Har zakhm-e-nihan qalb-e-Figaar ek sadaf hai,
Karne hain abhi daagh mujhe dil ke raqam aur!

Ek Puraana Khayaal...

2010-04-04T15:43:00.001-07:00

Shola-e-ishq jo bhadke to bhadakta jawe,
Zakhm-e-purkhaar ke seene mein khatakta jawe,

Kaun kambakht teri yaad mein jeena chahe,
Tera beemaar to ta-umr sisakta jawe,

Teri khushbu se nahi milti koi bhi khushbu,
Bagh to bagh bayaban bhi mahakta jawe,

Tujhko dekhe to pas-e-abr chhupe hai warna,
Chaand bala-e-lab-e-baam chamakta jawe,

Ek ajab kaif hai saaqi tere maikhane mein,
Jo teri bazm se utthe so chhalakta jawe…

Ahmad Mobashshir Samani

Main...

2010-04-04T15:42:00.001-07:00

Khayaal zehn ko aur lab sukhan ko tarsega,
Main chup hua to mere bankpan ko tarsega,
Mere habeeb, meri shayari mere afkaar,
Jo mit gaye to tu sarv-o-saman ko tarsega,
Mere baghair charaghon mein teergi hogi,
Sukoot-e-bazm hareeri kafan ko tarsega,
Hamare baad har ek bazm koor paoge,
Zamana sahib-e-arbaab-e-fan ko tarsega!

Bezaar...

2010-04-04T15:41:00.001-07:00

Na yakeen na muhabbat tha jo darmiyan nahi hai,
Hai sukoon dil mein paiham koi gham yahan nahi hai,
Inhi pattharon pe chalkar agar aa sako to aao,
Mere ghar ke raaste mein koi kahkashan nahi hai!
Jinhe aitmaad-e-janan tha wo ahd saare toote,
Ye jo dil ki dhadkanein hain kahin jawidan nahin hain!

Unique...

2010-04-04T15:40:00.001-07:00

Tu ke har baat pe be-saakhta hans deta hai,
Tujhse bad-ahd ka phir kaun bharosa rakkhe,
Mujhko accha nahi lagta koi humnaam tera,
Koi tujhsa ho to phir naam bhi tujhsa rakkhe…

Aitmaad (Faith)

2010-04-04T15:39:00.000-07:00

Tumhari baat tum jano tumhein kyun fikr hai meri,
Samajh kar sonch kar mujhse kabhi yaari nahi hoti,
Muhabbat ke qareenon se main wabasta na tha warna,
Jo baazi jeet sakta tha kabhi haari nahi hoti!

Ummeed...

2010-04-04T15:38:00.001-07:00

Kuch intezaar kabhi khatm hi nahi hote,
Kuch aitbaar ke kam ho sake na honge kabhi,
Hamein pata hai ke ye khel tha tumhare liye,
Magar chaman mein kabhi to bahaar aayegi….

Kuch Yaadein... My own Qitaa'

2010-04-04T15:37:00.001-07:00

Ab tu hi bata ai dil-e-nashaad karein kya?
Ab is se zyada tujhe barbaad karein kya?
Koshish to bahut ki ke kahin aur lage dil,
Bhoolein jo agar usko to phir yaad karein kya?

Ek Sher!

2010-04-04T12:38:00.001-07:00

Aksar tumhari yaad nahi aai saari shab,
Aksar main jaagta raha tasveer ki tarah...

Khud-Kalaami-7

2010-04-03T14:53:00.000-07:00

Tere baghair jafa-e-hayaat tal na sake,
Bahar-e-shauq ka kuch karobar chal na sake,

Na rang-o-nik'hat-e-gul pur-sukun na badah-e-maye,
Dil-o-dimaagh pe kuch khushgawar chal na sake,

Hawa charaagh se milkar bhi mil nahin pati,
Chale to jal na sake aur na ho to jal na sake,

Ye kaisa sahr kiya mujhpe teri ulfat ne,
Tere khayaal se aage kabhi nikal na sake,

Shab-e-firaaq ka aalam na poochh ai humdum,
Ke is sahar ke sitaare kabhi nikal na sake,

Teri nigaah se peekar bahak gaye warna,
Woh badanosh na the hum ke jo sambhal na sake,

Jaga ke yaar ko ab neend se pasheman hain,
Woh aankh malta raha hum ke jee ko mal na sake,

Us ek laghzish-e-pai ne kiya hai yun bismil,
Ke uske baad kabhi chaah kar phisal na sake,

Main ek charagh hun ek roz bujh hi jaunga,
Tera shabaab nahin hun kabhi jo dhal na sake,

Ajeeb lutf hai kaifiyat-e-junun mein mujhe,
Woh dil, figaar hun main gham se jo pighal na sake!

Khud-Kalaami-6

2010-04-03T14:51:00.001-07:00

Ab woh mausam guzar gaya yaaron,
Zakhm-e-gul besamar gaya yaaron,

Phool murjha gaye khayalon ke,
Ye gulistan bikhar gaya yaaron,

Daagh rah bhi gaye to kya gham hai,
Zakhm-e-kaari to bhar gaya yaaron,

Zeest ki talkhiyan nibaah to din,
Uska nashsha utar gaya yaaron,

Manzilon ki talash kaun kare,
Aabla pa thahar gaya yaaron,

Jab bhi yaad aai uski shaam ke baad,
Shaam se pahle ghar gaya yaaron,

Ab tavaqqo kahan ummeed kisi,
Mera ehsaas mar gaya yaaron,

Pichhle mausam mein toota ahd-e-wafa,
Ab ke main khud bikhar gaya yaaron,

The barabar gunaah ke woh shareek,
Jurm sab mere sar gaya yaaron,

Kyun figaar uski aarzu na kare,
Jo zamana guzar gaya yaaron!

Khud-Kalaami-5 "one of my own favourites"

2010-04-03T14:50:00.001-07:00

Khud apni aag mein din raat jal raha hun main,
Ziya mein doobe ho tum aur pighal raha hun main,

Badal diya hai zamane ne kuch chalan tera,
To tujhko dekh ke khud ko badal raha hun main,

Shama se kaisi muhabbat hai jan-nisaron ko,
Tere firaaq mein aankhon ko mal raha hun main,

Tamaam fikr-e-muhabbat to taal rakhhi hai,
Ye kiski yaad mein karwat badal raha hun main,

Main rind hun mujhe ek aur jaam de saaqi,
Isi ummeed pe gir kar sambhal raha hun main,

Hain aablon ko mere raaston ke khaar azeez,
Jo manzilon ki zadon se nikal raha hun main,

Wahin se laut ke aaya hun ek zamaane baad,
Jahan pe sabka parastaar kal raha hun main,

Meri talash mein apna pata na kho dena,
Tumhari sonch se aage nikal raha hun main,

Figaar maine hai barsaya anjuman mein noor,
Guzishta ahd ka sooraj hun dhal raha hun main!

Some old thoughts...Khudkalaami-4

2010-04-03T14:49:00.001-07:00

Gham ka aadi khushi se oob gaya,
Dil teri dosti se oob gaya,

Tere zakhmon ki thi bahaar magar,
Ab chaman dilkashi se oob gaya,

Tujhse main aur kya gila karta,
Hausla khamoshi se oob gaya,

Baraha main gaya tere dar par,
Han magar phir tujhi se oob gaya,

Hijr aur vasl ki ladaai mein,
Khwaab ki berukhi se oob gaya,

Dil sitan se gila na tha mujhko,
Main siyasatgari se oob gaya,

Talkh sachchai jab nazar aai,
Us munavvar pari se oob gaya,

Tum ho shayad talash-e-sang mein mahv,
Main to sheeshagari se oob gaya,

Hai ilaaj-e-gham-e-jahan pas-e-marg,
Teri charagari se oob gaya,

Kaun de mol dil ke kaanse ka,
Main to saudagari se oob gaya,

Teri fitrat bhi kya ajab hai figaar,
Jisko chaha usi se oob gaya!

Khud-Kalaami-3

2010-04-03T14:47:00.000-07:00

Ye na jane kaun sa mod hai meri zindagi ki saraab mein,
Wohi khaar jaise chubhein mujhe kabhi phool the jo kitaab mein,

Na tere karam ka hai aasra,na koi dua hai na mudda'a,
Na hai lutf wahm-e-sawaab mein,na azeeyatein hain azaab mein,

Tere bakhshe gham hain baja sanam,karun kya ke hai meri umr kam,
Mujhe ek mauqa mile agar shab-e-hijr rakkhun hisaab mein,

Tujhe shak hai gar mere shauq par to meri wafa ko parakh bhi le,
Hai tere alawa dhara hi kya mere qalb-e-khanakharaab mein,

Jo teri nigaahon se pee gaya unhin sagharon pe main jee gaya,
Meri kaifiyat ko badal sake ye kashish kahan hai sharaab mein,

Wohi likhne padhne ka shauq tha wohi likhne padhne ka shauq hai,
Tera naam likhna kitaab par tera naam padhna kitaab mein!

Ye aakhri sher Basheer Badr saahab ka hai jis se hiddayat haasil ki...

Parveen Shakir

2010-04-02T12:23:00.001-07:00

Aaj ki shab to kisi taur guzar jayegi!

Raat gahri hai magar chaand chamakta hai abhi...
Mere maathe pe tera pyar damakta hai abhi...
Meri saanson main tera lams mahakta hai abhi...
Mere seene mein tera naam dhadakta hai abhi...
Zeest karne ko mere pass buhat kuch hai abhi...

Teri aawaaz ka jaadu hai abhi mere liye...
Tere malboos ki khushboo hai abhi mere liye...
Teri baahein, tera pahloo hai abhi mere liye...
Sab se badh kar, meri jaan' tu hai abhi mere liye...
Zeest karne ko mere pass bahot kuch hai abhi...
Aaj ki shab to kisi tor guzar jayegi....

Aaj ke baad magar rang-e-wafa kya hoga...
Ishq hairaan' hai sar-e shahr-e saba kya hoga...
Mere qaatil! tera andaaz-e jafa kya hoga...
Aaj ki shab to bahot kuch hai magar kal ke liye...
Ek andesha-e-be-naam hai aur kuch bhi nahin
Dekhna ye hai ke kal tujh se mulaaqat ke baad,

Rang-e ummeed khilega ke bikhar jaayega...
Waqt parwaaz karega ke thahar jaayega...
Jeet ho jaayegi ya khel bikhar jaayega...
Khwaab ka shahr rahega ke ujad jaayega...!!!

Qitaa'

2010-04-01T07:14:00.000-07:00

Ye raushni hai kya ke nazar koor ho gai,
Jis mein thi teri yaad woh zulmat nahi hai ab;

Alfaaz raigaan hai zehan ke hisaar mein,
Mujhko tere khayaal ki sohbat nahi hai ab;

Dil chaahta to hai ken a chaahein tujhe magar,
Chaahat pe akhtiyaar ki chaahat nahi hai ab;

Mere khayaal mein bhi woh shokhi kahan rahi,
Uski nigaah mein bhi sharaarat nahi hai ab;

Aah-o-fughan mein ab woh kashish hai na woh tapish,
Aur phir muhabbaton mein bhi shiddat nahi hai ab;

Ab ishq bul-hawas hai faqat jism ki ghiza,
Rukhsaar-o-chashm-e-yaar pe rangat nahin hai ab;

Bikte hain ab to gosht, muhabbat hansi, khushi,
Ehsaas ki, waqaar ki qeemat nahi hai ab;

Har pyaar aaj jhooth ke kaandhon pe hai khada,
Is jazbe mein bhi koi sadaaqat nahin hai ab;

Aashiq ko bhi gurez hai ab jaur-o-sabr se,
Mashooq mein bhi koi nazakat nahin hai ab;

Mujhko tamaam umr rahega faqat yeh gham,
Ek dil thaw oh bhi uski amaanat nahi hai ab;

Ashkon mein bhi woh pahle si tughyaaniyan kahan,
Armaan ko bhi shauq-e-baghavat nahi hai ab;

Pahle bhi mujhko wasl ki khushfahmiyan na thin,
Yun bhi tere visaal ki soorat nahi hai ab;

Kisko sunayein haal-e-dil-e-zaar doston,
Is shahr mein nigaah-e-muravvat nahi hai ab;

Gham tha mujhe azeez ke had thin a kuch hisaab,
Gham hai to yeh ke dard ki daulat nahi hai ab;

Mujhse sitam ki shakl mein go raabta to tha,
Rootha to mujhse koi adaavat nahin hai ab;

Mera junoon bhi barf sa ab sard ho gaya,
Teri bhi ai jameel woh shohrat nahi hai ab;

Ab raaste ki fikr na manzil ki kuch talab,
Woh meri hum-safeer qayaamat nahi hai ab;

Allah mujh ghareeb ke eimaan ki khair ho,
Kya hai ke koi wajah-e-ibaadat nahi hai ab;

Behis sa ho gaya hun khushi hai na koi gham,
Meri dua mein karb ki shiddat nahi hai ab;

Woh kya thahar gaya meri duniya thahar gai,
Haan haan ke mujhko shauq-e-musaafat nahin hai ab;

Bhar jayein zakhm yak e guzar jayein hum Figaar,
Yun hai ke mujhko shauq-e-jaraahat nahin hai ab!

Khudkalaami-2

2010-03-31T07:52:00.001-07:00

Dil ko qaraar hai ke muhabbat nahin hai ab,
Jeeta to hun pe zeest mein lazzat nahin hai ab;

Furqat ke roz-o-shab woh mere dard ka sabab,
Kya hosh ke khayaal ki fursat nahin hai ab;

Woh wahshat-e-junoon woh hungaam-e-yaas-o-ashk,
Kya kya ghubaar the ke woh wahshat nahin hai ab;

Tanha tha ek dard ke har lamha tha rafeeq,
Han dard se bhi dil ko sakhavat nahin hai ab;

Tum to samajh rahe the mujhe tumse pyaar hai,
Dekho meri kisi se rifaaqat nahin hai ab;

Ab din guzar rahe hain baharhaal chain se,
Mujhko kisi se koi shikayat nahin hai ab;

Woh bhi the din ke likhta tha har shaam ek ghazal,
Han dil ko khoon karne ki himmat nahin hai ab;

Tum bhi to mujhko bhool gaye khwaab ki tarah,
Mujh mein bhi woh nibaah ki fitrat nahin hai ab;

Aankhon se intezaar ke mausam guzar gaye,
Sach hai ke vasl-e-yaar ki sa'at nahin hai ab;

Kya zindagi ka zikr karein zahr hai Figaar,
Husn-o-jamaal-e-yaar ki sohbat nahin hai ab!

Waseem...

2010-03-26T14:22:00.000-07:00

Usoolon par jahan aanch aaye takrana zaroori hai,
Agar zinda ho to zinda nazar aana zaroori hai;

Nai umron ki khud-mukhtaariyon ko kaun samjhaaye,
Kahan se bach ke chalna hai kahan jaana zaroori hai;

Bahut bebaak aankhon mein ta'alluq tik nahin sakta,
Muhabbat mein kashish rakhne ko sharmaana zaroori hai;

Thake haare parinde jab basere ke liye lautein,
Saleeqamand shaakhon ka lachak jaana zaroori hai;

Mere honton pe apni pyaas rakh do aur phir soncho,
Ke iske baad bhi duniya mein kuch paana zaroori hai!!!

Khud-Kalaami

2010-03-25T10:18:00.000-07:00

Karam hai ye ke mujhe dar-ba-dar nahin karta,
Magar duayein meri pur-asar nahin karta;
Khuda muaaf to karta hai har khata ko meri,
Yeh aur baat ke mujhko khabar nahin karta;
Main tark tujhse ta'alluq che kar bhi sakta hun,
Yeh jaanta hun meri jaan magar nahin karta;
Woh mujhko chhod ke chal dega ek din tanha,
Yaqeen hota to hargiz safar nahin karta;
Khud-aitmaadi hai be-inteha ki yun mujh mein,
Main apni sonch se aage guzar nahin karta;
Tumhaari yaad mein go neend to nahin aati,
Magar main raat ko ro ro sahar nahin karta;
Hazaar chehre hain jo tumse khoobsoorat hain;
Hazaar hain pe koi dil mein ghar nahin karta;
Nazar se koor hun main jo nazar se door hai tu,
Main tere baad kisi par nazar nahin karta;
Fareb-e-raah ka apna alag maza hai Figaar,
Isiliye to main manzil ko sar nahin karta!

Aap bahut ajeeb hain...

2010-03-22T13:56:00.000-07:00

Gham se bahal rahe hain aap, aap bahut ajeeb hain,
Dard mein dhal rahe hain aap, aap bahut ajeeb hain;

Saaya-e-vasl kabse hai aapka muntazir magar,
Hijr mein jal rahe hain aap, aap bahut ajeeb hain;

Apne khilaaf faislaa khud hi likha hai aapne,
Haath bhi mal rahe hain aap, aap bahut ajeeb hain;

Waqt ne aarzu ki lau der hui bujha bhi di,
Ab bhi pighal rahe hain aap, aap bahut ajeeb hain;

Zahmat-e-zarbat-e-digar dost ko dijiye nahin,
Gir ke sambhal rahe hain aap, aap bahut ajeeb hain;

Daayara-waar hi to hain ishq ki raaste tamaam,
Raah badal rahe hain aap, aap bahut ajeeb hain;

Dasht ki saari raunaqein khair se ghar mein hon to kya,
Ghar se nikal rahe hain aap, aap bahut ajeeb hain;

Apni talaash ka safar khatm bhi kijiye kabhi,
Khwaab mein chal rahe hain aap, aap bahut ajeeb hain...

Shakeel...Wonderful!

2010-03-21T03:27:00.000-07:00

Yeh aish-o-tarab ke deewaane bekaar ki baatein karte hain,
Paayal ke ghamon ka ilm nahin jhankaar ki baatein karte hain;

Naahak hai hawas ke bandon ko nazzara-e-fitrat ka daawa,
Aankhon mein nahin hai betaabi deedaar ki baatein karte hain;

Kahte hain unhin ko dushman-e-dil hai naam unhin ka naaseh bhi,
Woh log jo rah kar saahil per manjhdhar ki baatein karte hain;

Pahunche hain jo apni manzil par unko to nahin kuch naaz-e-safar,
Chalne ka jinhein maqdoor nahin raftaar ki baatein karte hain!

Shakeel...

2010-03-21T03:19:00.000-07:00

Gham-e-aashiqui se kah do rah-e-aam tak na pahunche,
Mujhe khauf hai eh tohmat mere naam tak na pahunche;

Main nazar se pee raha tha to yeh dil ne bad-dua di,
Tera haath zindagi bhar kabhi jaam tak na pahunche;

Nai sub'ha par nazar hai magar aah yeh bhi dar hai,
Yeh sahar bhi rafta rafta kahin shaam tak na pahunche;

Wo nava'a-e-muzmahil kya na ho jis mein dil ki dhadkan,
Woh sada-e-ahl-e-dil kya jo awaam tak na pahunche;

Unhein apne dil ki khabrein mere dil se mil rahi hain,
Main jo unse rooth jaun to payaam tak na pahunche;

Yeh ada-e-beniyaazi tujhe bewafa mubaarak,
Magar aisi berukhi kya ke salaam tak na pahunche;

Jo naqaab-e-rukh uttha di to yeh qaid bhi laga di,
Utthe har nigaah lekin koi baam tak na pahunche;

Wohi ek khamosh naghma hai Shakeel jaan-e-hasti,
Jo zubaan tak na aaye jo kalaam tak na pahunche!

Aaj ki raat! my b'day thought!

2010-03-20T16:12:00.000-07:00

Dasht-e-tanhai mein aye jaan-e-jahan larzaan hain
teri awaaz ke saaye tere honthon ke saraab
dasht-e-tanhai mein doori ke khas-o-khaak tale
khil rahe hain tere pahalu ke saman aur gulaab

Uth rahi hai kahin qurbat se teri saans ki aanch
apni khushboo mein sulagti hui maddham maddham
door ufaq par chamakati hui qatra qatra
gir rahi hai teri dildaar nazar ki shabnam

Us qadar pyaar se aye jaan-e-jahan rakha hai
dil ke rukhsaar pe is waqt teri yaad ne haath
yun guman hota hai garche hai abhi subah-e-firaaq
dhal gaya hijr ka din aa bhi gayi vasl ki raat...

Qaiser ul Jafri

2010-02-26T06:28:00.000-08:00

Tumhare shahar ka mausam bara suhana lage,
Main ek shaam chura lun agar bura na lage;

Tumhare bas may agar ho to bhul jao hamein,
Tumhein bhulane mein shayad mujhe zamana lage;

Hamare pyar se jalane lagi hai ye duniya,
Dua karo kisi dushman ki baddua na lage;

Na jane kya hai kisi ki udaas ankhon mein,
Wo munh chhupa ke bhi jaye to bewafa na lage;

Jo doobna hai to itne sukoon se doobo,
Ke aas paas ki lahron ko bhi pata na lage;

Kuch is tarah se mere sath bewafai kar,
Ke tere bad mujhe koi bewafa na lage;

Wo phool jo mere daman se ho gaye mansoob,
Khuda kare unhein bazar ki hawa na lage;

Tum aankh moond ke pee jao zindagi `Qaiser`
Ke ek ghunt me shayad ye badmaza na lage...

Nasir Kazmi

2010-02-21T06:43:00.000-08:00

Mumkin nahi'n mata-e-sukhan mujh se chheen le,
Go baagbaa'n ye kanj-e-chaman mujh se chheen le;

Gar ehtaraam-e-rasm-e-wafa hai to ae KHUDA,
Ye ehtaraam-e-rasm-e-kohan mujh se chheen le;

Manzar dil-o-nigaah ke jab ho gaye udaas,
Ye be-faza ilaaqa-o-tan mujh se chheen le;

Gulrez meri naalakashi se hai shaakh-shaakh,
Gulchee'n ka bas chale to ye fan mujh se chheen le;

Seenchi hain dil ke khoon se maine ye kyaariyaa'n,
Kis ki majaal mera chaman mujh se chheen le...

Henry Kissinger

2010-02-21T06:41:00.000-08:00

Accept everything about yourself i mean everything... You are you and that is the beginning and the end no apologies, no regrets...

Linkin Park

2010-02-21T05:39:00.000-08:00

Crawling in my skin...
These wounds, they will not heal,
Fear is how I fall...
Confusing what is real;

There's something inside me that pulls beneath the surface
Consuming, confusing...
This lack of self control I fear is never ending
Controlling, I can't seem...

To find myself again
My walls are closing in...
(Without a sense of confidence I'm convinced that there's just too much pressure to take)
I've felt this way before
So insecure...

Discomfort, endlessly has pulled itself upon me
Distracting, reacting...
Against my will I stand beside my own reflection
It's haunting how I can't seem...

To find myself again
My walls are closing in...
(Without a sense of confidence I'm convinced that there's just too much pressure to take)
I've felt this way before
So insecure...

ATIF SAEED

2010-02-18T12:52:00.000-08:00

Ajab Pagal Si Larki Hai......

Ajab Pagal Si Larki Hai
Mujhe har khat main likhti hai
“Mujhe tum yaad karte ho?
Tumhein main yaad aati hun?”

Meri baatein satati hain
Meri neendein jagati hain
Meri aankhein rulaati hain

December ki sunehri dhoop main ab bhi tahelte ho?
Kisi khamosh rastay se koi awaaz aati hai?
Thithurti sard raaton mein tum abb bhi chhatt pe jate ho?
Falak ke sab sitaron ko meri baatein sunate ho?

Kitabon se tumhare ishq mein koi kami aai?
Ya meri yaad ke shiddat se aankhon mein nami aai?
Ajab pagal Si larki hai mujhe har khat main likhti hai..

Jawaban us ko likhta hoon..

Meri masroofiyat dekho subah se shaam office mein
Charagh-e-umr jalta hai
Phir us ke baad duniya ki
Kaee majbooriyan pao`n mein baedi daal rakhti hain
Mujhe be-fikr, chahat se bhare sapne nahin dikhte
Tahelnay, jagne, ronay ki mohlat hi nahin milti
Sitaroon se mile arsa hua...naraz hon shayad
Kitaboon se shaghaf mera abhi waise hi qayam hai
Farq itna pada hai ab unhein arsay mein padhta hoon
Tumhein kis ne kaha pagli tumhein main yaad karta hoon

Ke main khud ko bhulane ki musalsal justju mein hoon
Tumhein na yaad aane ki musalsal justju mein hoon
Mager yeh justju meri bohat nakaam rahti hai
Mere din raat mein ab bhi tumhari shaam rahti hai
Mere lafzon ki her maala tumhare naam rahti hai
Tumhein kis ne kaha pagli tumhein main yaad karta hoon

Purani baat hai jo log aksar gungunatay hain
Uneain ham yaad karte hain jinhein ham bhool jate hain
Ajab pagal si larki ho
Meri masroofiyat dekho
Tumhein dil se bhulaun to tumhari yaad aaye na...
Tumhein dil se bulane ki mujhe fursat nahin milti
Aur is masroof jeewan mein
Tumahre khat ka ik jumla
“Tumhein main yaad aati hoon?”
Meri chahat ki shiddat mein kami hone nahin deta
Bahot raatein jagata hai mujhe sone nahin deta
So agli baar apne khat mein yeh jumla nahin likhna...

Ajab pagal si larki hai mujhe phir bhi ye likhti hai
"Mujhe tum yaad karte ho, tumhein main yaad aati hoon???

WASI SHAH

2010-02-16T04:37:00.000-08:00

Kaash main tere haseen haath ka kangan hota...

tu bade pyaar,bade chaao se armaan ke saath
apni naazuk si kalaai mein chadhaati mujhko
aur betaabi se furqat ke khizaa'n lamho'n mein
tu kisi soch mein doobi jo ghumaati mujhko
main tere haath ki khushbu se mehak sa jaata
jab kabhi mood mein aakar mujhe chooma karti
main tere hontho'n ki shiddat se dehak sa jaata

raat ko jab bhi tu neendo'n ke safar par jaati
marmari haath ka ek takiya banaaya karti
main tere kaan se lag kar kaee baatein karta
teri zulfo'n ko,tere gaal ko chooma karta
jab bhi tu band qaba kholne lagti jaanan
apni aankho'n ko tere husn se chhhera karta
mujhko betaab sa rakhta teri chaahat ka nasha
main teri rooh ke gulshan mein mehakta rehta
main tere jism ke aangan mein khanakta rehta
kuch nahi'n to yahi benaam sa bandhan hota

kaash main tere haseen haath ka kangan hota....

Love's Secret!

2010-02-14T11:40:00.001-08:00

Mohabbat Rog Hai Jaanan
Ajab Sanjog Hai Jaanan
Yeh Kaisa Jog Hai Jaanan...

Bade Boodhey Batatay Thay
Kai Qissay Sunatay Thay
Magar Hum Mantay Kab Thay
Yeah Sab Kuch Jaantay Kab Thay
Yeh Baatein Zikr Ke Qabil
Bhala Gardantay Kab Thay

Ana Ke Takht Par Baithay
Humein Maloom Hi Kab Tha
Ana Ke Takht Se Oopar
Bohat Sari Bulandi Par
Kahin Pariyon Ke Jhurmut Mein
Tere Pairon Ki Payal Mein
Tere Chhotay Se Gaaon Mein
Ghani Zulfon Ki Chaaon Mein
Sitaray Chand Sooraj
Walehana Raqs Karte Hein

Humein Maloom Hi Kab Tha
Tere Qadmon Ki Aahat Par
Gulabi Muskrahat Par
Tere Honton Ki Jumbish Par
Tere Sar Ke isharay Par
Sada-e-Dilbarana Par
Nigah-e-Qaatilana Par
Jafa-e-Mahrmana Par
Adaa-e-Kaafirana Par
Chaman Ke Phool Saray
is Tarah Se Dhyaan Dete Hein
Zara Se Wasl Ke Jhansay
Mein Apni Jaan Dete Hein

Humein Kab ilm Tha Jaanan
Tere Paikar Se Dhul Kar
Chandni Har Su Bikharti Hai
Shab-e-Mahtaab Ki Dosheezgi
Kaisay Nikharti Hai
Teri Payal Ki Chhan Chhan
Man Mein Kya Ghanti Bajati Hai
Teri Awaaz Veeranay Mein
Kya Jaadu Jagati Hai
Tere Naghmay Faza Mein
Kis Tarah Jaltrang Bajatay Hain
Bohat Pukhta iraday!!!!
Kis Tarah Se Toot Jaatay Hain...

Hamein idraak Hi Kab Tha
Hamein Kamil Bharosa Tha
Hamaray Saath Kisi Soorat
Bhi Aisa Nehin Ho Ga
Dil-e-Naadaan Kabhi!!!
Qaboo Se Be-Qaboo Nahin Ho Ga
Yeh Duniyadaar!!!
Duniyadaar Se Saadhoo Nahin Ho Ga

Magar!!!
Magar Phir Yoon Hua Jaanan
Najaanay Kyun!! Hua Jaanan
Bara Afsoon!!! Hua Jaanan
Jigar Ka Khoon Hua Jaanan

Tere Abru Ki ik Junbish
Se Ghaayal Ho Gaye Hum Bhi
Baray Be-Multafit Phirtay Thay
Maa'il Ho Gaye!!!! Hum Bhi
Sakhawat Karne Aaye Thay
Au Sail Ho Gaye Hum Bhi
Bade Booodhon Ki in Baaton Ke
Qaail Ho Gaye!!! Hum Bhi
Ke
Mohabbat Rog Hai Jaanan
Ajab Sanjog Hai Jaanan
Yeah Kaisa Jog Hai Jaanan...

Some words taken some my own...On a Valentine's Day!

2010-02-14T07:30:00.000-08:00

Ab Mujhe Koi intezaar kahan,
Woh jo bahte the aab-shaar kahan?
Ab woh ulfat ke karobaar kahan,
Woh jo karte the beqaraar kahan?
Ab woh nazzara-o-nazar na rahe,
Ab kisi shai mein woh khumaar kahan?
Saari takleef thi to maazi se,
Haal mein dard-e-beshumaar kahan?
Woh pari-rukh nahin raha mera,
Ab kisi bewafa se pyaar kahan?
Khud se jab aitmaad uth jaye,
Phir kisi par ho aitbaar kahan?
Sard aahein bhi thamti jaati hain,
Qalb mein ab koi sharaar kahan?
Ab mere saath ek zamaana hai,
Ab main tanhaai ka shikaar kahan?
Main December ko jab se bhoola hun,
Koi mausam hai khush-gawaar kahan?
Ab badan toot-ta hai kaam ke baad,
Ab tere ishq ka bukhaar kahan?
Ab muhabbat kahan ke yaad karein,
Gul kahan chhoote aur khaar kahan?
Ab khizan se chaman ko raahat hai,
Ab hamein khwaahish-e-bahaar kahan!
Neend aati hai aur nahin aati,
Woh teri zulf-e-mushkbaar kahan!
Humse shohrat mili hai sab tumko,
Humsa dhoondhoge tum Figaar kahan?

Faiz Ahmad Faiz...

2010-02-14T06:37:00.000-08:00

Raushan kaheen bahaar ke imkaan huye to hain,
Gulshan mein chaak chand garebaan huye to hain.

Ab bhi khizaan ka raaj hai lekin kaheen kaheen,
Gosh-e-rah-e-chaman mein ghazal-khvaan huye to hain.

Thahri huyi hai shab ki siyaahi vaheen magar,
Kuch kuch sahar ke rang purafshaan huye to hain.

In mein lahu jalaa ho hamara ke jaan-o-dil,
Mehfil mein kuch chiraagh farozaan huye to hain.

Haan kaj karo kulaah ke sab kuch luta ke hum,
Ab be-niyaaz-e-gardish-e-dauraan huye to hain.

Ahl-e-qafas ki subah-e-chaman mein khulegi aankh,
Baad-e-sabaa se vada-e-paimaan huye to hain.

Hai dasht ab bhi dasht magar, khoon-e-paa se "Faiz",
Sairaab chand khaar-e-mugelaan huye to hain...

~~~Dil Hijr K dard Se Bojhal Hai~~~ Insha!

2010-02-12T09:15:00.000-08:00

Dil Hijr Ke dard Se Bojhal Hai, Ab Aaan Milo To Behtar Ho
Is Baat Se Humko Kya Matlab, Ye Kaise Ho Ye Kyun kar ho??

Ik Bheekh ke Dono Kaan’se Hain, Ik Pyaas ke Dono Pyase hain
Hum Khaiti hain, Tum Badal Ho,Hum Nadya hain,Tum Sagar Ho,

Hum Sanjh Samay ki chaya hain, Tum Charhti Raat Ke ChandarMaa’an
Hum Aate Hain, Tum Jate ho, Phir Mel Ki Soorat kyun kar ho

Ab Husn Ka Rutbaa Aali Hai, Ab Husn Se Sehra Khali hai
Chal Basti me Banjara Ban, Chal Nagri me Saudgar ho

Jis Cheez se Tujhko Nisbat Hai,Jis Cheez se tujh ko Chahat hai
Wo Sona Hai,Wo Heera Hai, Wo Maati Ho Ya Kunkar ho

Wo Raatein Chand Ke Saath Gain, Wo Baatein Chand ke Sath Gain
Us Sukh k Sapne dekhe kyun, Jab Dukh ka soraj sar par Ho

Ab Insha Ji Ko Bulana Kya, Ab Pyaar ke Deep Jalana Kya??
Jab Dhoop Or Chaya Aik se ho, Jab Din Or Raat Barabar ho!!!

Ahmad Faraz

2010-02-12T08:36:00.000-08:00

Iss daur-e-bejunoo’n ki kahaani koi likho
Jismo’n ko barf khoon ko paani koi likho,

koi kaho ki haath qalam kis tarah huey
kyun ruk gaee qalam ki ravaani koi likho,

kyon ahl-e-shauq sar-ba-garebaa’n hain dosto’n
kyon khoo’n-ba-dil hai ahd-e-jawaani koi likho,

kyon surma dar gulu hai har ek taair-e-sukhan
kyon gulsitaa’n qafas ka hai saani koi likho,

haan taaza saaneho’n ka kare kaun intezaar
haan dil ki vaardaat puraani koi likho...

.....Those days......

2010-02-11T12:50:00.000-08:00

Wo saari baatein khwaab huien
Aur khaab se phir azaab huien
Jub tum ko saba ke jhonkay se
Paigham hamara milta tha
Jub meri aik nazer se hee
Chehra ye tumhara khilta tha
Kuch yaad sa tum ko hai janan
Jub phone ki aadat roz ki thi
Kuch daer jo mujh ko ho jati
Tum ghanton rootha kertay thay
Kabhi geeton ki kabhi sheron ki
Tum khahish mujh se kertay thay
Kabhi pyar tha meri baton se
Meray chehre se meri aankhon se
Aur jhank ke meri aankhon mey
Tum khud ko dhoonda kertay tha
Ak doo din dekh na pao tow
Tum bekul bekul rehtay thay
Aur ab tow aisa aalam hai
Koi chahat hai na ulfat hai
Kya pyar¡¯ mohabbat aur wafa
Is zikr se tum ko vehshat hai
Mein laakh tussalli khud ko doun
Keh ab bhi teri khahish hon
Anjaan bazahir lagtay ho
Mein ab bhi tera mehvar hon
Per dhoka aakhir dhoka hai
Kab tuk dil ko behlaye ga
Doo pal ki khushiyan de ker ye
Mujhe sadiyan lahu rulaye ga
Kion tum taqdeer se larti ho
Kion khud ko dhoka deity ho
Khabon ke tukre chun ke ab
Kion khud ko ghayal kerti ho
Ye baat tumhein maloom tow hai
Kab beiti yadein lauti hai
Jo baatein khwaab si ho jayein
Wo baatein khwaab hee rehti hain
...............................

Ahmad Faraz

2010-02-07T13:07:00.001-08:00

Main mar mita to woh samjha ye inteha thi meri
Usay khabar he na thi, khak keemya thi meri
Main chup howa to woh samjha k baat khatm huee
Phir uss ke baad to aawaaz ja-ba-ja thi meri
Jo taanazan tha meri poshash-e-dareedah par
Usi ke dosh pe rakkhi hui qaba thi meri
Main uss ko yaad karoon bhi to yaad ata nahi
Main uss ko bhool gaya hoon yahi saza thi meri
Shikast de gya apna ghuroor hi usko
Wagarna uss ke muqabil bisaat kya thi meri
Kahin dimagh kahin dil kahin badan he badan
Har ek se dosti yaari juda juda thi meri
Main uss ko dekhta rahta tha hairaton se Faraz
Yeh zindagi se ta’arruf ki ibtedaa thi meri!

Ahmad Faraz!

2010-02-07T02:10:00.000-08:00

Phir Usi Raah Guzar Par Shayad,

Hum Kabhi Mil Sakei'n Magar, Shayad...

Jinke Hum Muntazar Rahe Unko,

Mil gaye Aur Humsafar Shayad...

Jaan Pahchaan Se Bhi Kya Hoga,

Phir Bhi Ai Dost, Ghaur Kar Shayad...

Ajnabeeyat ki Dhund Chhat Jaye,

Chamak Utthe Teri Nazar Shayad...

Zindagi Bhar Lahu Rulaayegi,

Yaad-e-Yaaran-e-Bekhabar Shayad...

Jo Bhi Bichh're Wo Kab Mile hai'n FARAZ,

Phir Bhi Tu Intezaar kar Shayad....!!!

Ibn-e-Insha

2010-02-04T06:44:00.000-08:00

Dil ishq mein be-paayaa'n , sauda ho to aisa ho,

Dariya ho to aisa ho, sehra ho to aisa ho;

Ek khaal-e-suvaida mein, pihnaai-e-do-aalam,

Phaila ho to aisa ho, simta ho to aisa ho;

Ai Qais-e-junu'n pesha, Insha ko kahee'n dekha,

Wahshi ho to aisa ho, rusva ho to aisa ho;

Dariya ba-hubaab andar, toofaa'n ba-sahaab andar,

Mahshar ba-hijaab andar, hona ho to aisa ho;

Ham se nahi rishta bhi, hamse nahi milta bhi,

Hai paas wo baitha bhi, dhokha ho to aisa ho;

Wo bhi raha begaana, hamne bhi na pehchaana,

Haan ae dil-e-deewana, apna ho to aisa ho;

Is dard mein kya-kya hai, rusvaai bhi lazzat bhi,

Kaanta ho to aisa ho, chubhta ho to aisa ho;

Ham ne yahi maanga tha , usne yahi bakhsha tha,

Banda ho to aisa ho, daata ho to aisa ho...

Nasir Kazmi

2010-02-02T07:44:00.000-08:00

Girafta dil hain bahot aaj tere deewane,

Khuda kare koi tere siva na pehchaane;

Miti-miti si ummeedein thake-thake se khayaal,

Bujhe-bujhe se nigaaho'n mein gham ke afsaane;

Hazaar shukr ke hum ne zubaa'n se kuch na kaha,

Ye aur baat ke poochha na ahl-e-duniya ne;

Ba-qadr-e-tashna-labi pursish-e-wafa na huee,

Chhalak ke rah gaye teri nazar ke paimaane;

Khayaal aa gaya maayoos rahguzaaro'n ka,

Palat ke aa gaye manzil se tere deewane;

Kahaa'n hai tu ke tere intezaar mein ae dost,

Tamaam raat sulagte hain dil ke veeraane;

Ummeed-e-pursish-e-gham kis se keejiye 'Nasir,'

Jo mere dil pe guzarti hai koi kya jaane...

ALI SARDAR JAFRI

2010-02-02T07:40:00.000-08:00

Ek ju-e-dard dil se jigar tak ravaa'n hai aaj,

Pighla hua rago'n mein ek aatish-fishaa'n hai aaj;

Lab see diye hain taa na shikaayat kare koi,

Lekin har ek zakhm ke munh mein zabaa'n hai aaj;

Taareekiyo'n ne gher liya hai hayaat ko,

Lekin kisi ka ru-e-hasee'n darmiyaa'n hai aaj;

Jeene ka waqt hai yahi, marne ka waqt hai,

Dil apni zindagi se bahot shaadmaa'n hai aaj;

Ho jaata hoon shaheed har ahl-e-wafa ke saath,

Har daastaan-e-shauq meri daastaa'n hai aaj;

Aaye hain kis nishaat se hum qatl-gaah mein,

Zakhmo'n se dil hai choor nazar gul-fishaa'n hai aaj;

Zindaaniyo'n ne tod diya zulm ka ghuroor,

Wo dab-daba wo raub-e-hukoomat kahaa'n hai aaj...

Figaar!

2010-02-02T07:35:00.000-08:00

Dard-e-dil kya hai aur gham kya hai?
Bekhudi hai to phir waham kya hai?

Ab sukun hai sukun na hone mein,
Mujh se betaab ko karam kya hai?

Aap se gar mujhe mayassar ho,
To tamaam umr ka sitam kya hai!

Kitna dushwaar jaadah-e-manzil,
Teri zulfon ka pech-o-kham kya hai!

MAJAZ LAKHNAWI

2010-01-31T01:24:00.000-08:00

Ab mere paas tum aayee ho to kya aayee ho,

maine maana ki tum ek paikar-e-ranaai ho,

chaman-e-dehar mein ru-e-chaman aaraai ho,

talat-e-mehar ho, firdaus ki barnaai ho,

bint-e-mehtaab ho, gardu'n se utar aayee ho,

mujhse milne mein ab andesha-e-ruswaai hai,

maine khud apne kiye ki ye sazaa paai hai,

khaak mein aah milaai hai jawaani maine,

shola-zaaro'n mein jalaai hai jawaani maine,

shahr-e-khoobaa'n mein lutaai hai jawaani maine,

khwaab-gaaho'n mein ganwaai hai jawaani maine,

husn ne jab bhi inaayat ki nazar daali hai,

mere paimaan-e-mohabbat ne sipar daali hai,

unn dino'n mujh pe qayaamat ka junoo'n taari tha,

sar pe sarshari-o-ishrat ka junoo'n taari tha,

maah-paaro'n se mohabbat ka junoo'n taari tha,

shahryaaro'n se raqaabat ka junoo'n taari tha,

bistar-e-makhmal-o-sanjaab thi duniya meri,

ek rangeen-o-hansi khwaab thi duniya meri,

kya sunogi meri majrooh jawaani ki pukaar,

meri fariyaad-e-jigardoz mera naala-e-zaar,

shiddat-e-karb mein doobi huee meri guftaar,

main ke khud apne mazaak-e-tarab aagee'n ka shikaar,

wo gudaaz-e-dil-e-marhoom kahaan se laau'n,

ab main wo jazba-e-masoom kahaan se laau'n....

Saleem Kausar!

2010-01-30T00:16:00.000-08:00

Main khayaal hun kisi aur ka mujhe sonchta koi aur hai,
Mera aks hai sar-e-aaina pas-e-aaina koi aur hai;

Main kisi ke dast-e-talab mein hun to kisi ke harf-e-dua mein hun,
Main naseeb hun kisi aur ka mujhe maangta koi aur hai;

Ajab aitbaar-o-beaitbaari ke darmyaan hai zindagi,
Main qareeb hun kisi aur ke mujhe jaanta koi aur hai;

Teri raushni tere khadd-o-khaal se mukhtalif to nahin magar,
Tu qareeb aa tujhe dekh lun tu wohi hai ya koi aur hai;

Tujhe dushmanon ki khabar na thi mujhe doston ka pata na tha,

Teri dastan koi aur thi mera waqia koi aur hai;

Wohi munsifon ki riwaayatein wohi faislon ki ibaaratein,
Mera jurm to koi aur tha pe meri saza koi aur hai;

Kabhi laut aayein to poochhna nahin dekhna unhein ghaur se,
Jinhein raaste mein khabar hui ke yeh raasta koi aur hai;

Jo meri riyaazat-e-neemshab ko "Saleem" sub'ha na mil saki,
To phir is ke maa'ni to yeh hua ke yahan khuda koi aur hai!

Mohsin.........

2010-01-26T03:14:00.000-08:00

Udaasiyon ka ye mousam badal bhi sakta tha,

Wo chahta to mere saath chal bhi sakta tha!

Wo Shakhs tu ne jisay chhorne mein jaldi ki,

Tere mizaaj ke sanche main dhal bhi sakta tha!

Wo jald-baaz khafa ho ke chal diya warna,

Tanaaziaat ka koi hal nikal bhi sakta tha!

Ana ne haath uthaane nahin diya warna,

Meri duaa se wo patthar pighal bhi sakta tha!

Tamaam umr tera muntazir raha Mohsin'

Ye aur baat wo rastaa badal bhi sakta tha!!!

My Very Own...

2010-01-25T07:33:00.000-08:00

I had some dreams my very own,
My heart screams since you're gone,

Your eyes so deep and lost in sleep,
Your lips so full, tast'd so sweet,
Your skin so smooth and soft to touch,
Your face so dear so very rare,

I want them all to come again,
The dreams I had my very own!

Your words so warm and full of love,
Your body frail and light like dove,
Your hairs so dark and bountiful,
Your scent enchants my sense still,

I want this pain to end and done,
Still hold those dreams my very own!

Your love so tender without disguise,
Your kiss that linger, still mesmerise,
Your cheek so red they hurt me yet,
Your bossom's heave, make me regret,

I pour this storm of teras at night,
I think of the dream my very own!
Moby!

I Miss You!

2010-01-24T06:58:00.000-08:00

Jab Yunhi Kabhi Baithay Baithay,
Kuch Yaad Achanak Aa jaye,
Har Baat Say Dil Bayzaar Sa Ho,
Har Cheez Say Dil Ghabra jaye,
Karna Bhi Mujhe Kuch Aur Hi Ho,
Kuch Aur Hi Mujh Say Ho jaye,
Kuch Aur He Sonchun Main Dil Mein,
Kuch Aur Hi Honthon Par Aaye,
Aisay Hi Kisi Ek Lamhay Mein,
Chupke Say Kabhi Khamoshi Mein,
Kuch Phool Achanak Khil jayen,
Kuch Beetay Lamhe Yaad Aayein,

Tab Yaad Tumhari Aatee Hay…

Jab Chandni Dil Kay Aangan Mein,
Kuch Kahne Mujh Say Aa jaye,
Ek Khwab Sa Jaise Dhundh Koi,
Ehsaas Pay Mere Chhaa jaye,
Jab Zulf Pareshaan Chehray Par,
Kuch Aur Pareshaan Ho jaye,
Kuch Dard Bhi Dil Mein Hone Lage,
Aur Saans Bhi Bojhal Ho jaye,
Aisay He Kisi Aik Lamhay Mein,
Chupkay Say Kabhi Khamoshi Mein,
Kuch Phool Achanak Khil jayein,
Kuch Beetay Lamhe Yaad Aayein,

Tab Yaad Tumhari Aatee Hay…

Jab Shaam Dhalay Chaltay Chaltay,
Manzil Ka Na Koi Naam Mile,
Ik Hansta Hua Aaghaz Mile,
Ik Rota Huaa Anjaam Mile,
Palkon Kay Laraztay Ashkon Say,
Is Dil Ko Koi Paigham Mile,
Aur Sari Wafaon Kay Badlay,
Mujh Ko Hi Koi Ilzaam Mile,
Aisay He Kisi Ek Lamhay Mein,
Chupkay Say Kabhi Khamoshi Mein,
Kuch Phool Achanak Khil jayein,
Kuch Beetay Lamhe Yaad Aayein,

Tab Yaad Tumhari Aatee Hay…

Noor Gorakhpuri

2009-12-21T07:27:00.000-08:00

Tumhari bazm se woh kaun hai jo kaamgaar aaya,

Jo baitha muztarib baitha jo uttha beqaraar aaya!

Mizaaj-e-bulbul-o-gul mein bhi rang-e-kaarobaar aaya,

Hawa-e-baal-o-par aai khayaal-e-barg-o-baar aaya!

Ruke naale dabe arman bujha dil aur thame aansu,

Qaraar isko agar kahte hain to mujhko qaraar aaya!

Ijaazat is se aage di na aaina-e-muhabbat ne,

Umad kar dil se aankhon mein lahu go baar baar aaya!